Me kënaqësi ju ftojmë të merrni pjesë në promovimin e librit “Për Dy Mijë Vjet” të autorit Mihail Sebastian, i përkthyer për herë të parë në gjuhën shqipe nga kolegia jonë, Gersa Rrudha. Ky aktivitet do të zhvillohet më 18 mars 2025, ora 14:00, në ambientet e Universitetit Mesdhetar të Shqipërisë, me mbështetjen e platformës Tricolor.al dhe nën kujdesin e veçantë të Ambasadorit të Rumanisë, Sh.T.Z. Octavian Șerban.
Ky event shënon një moment të rëndësishëm për Tricolor.al, duke qenë i pari në një sërë aktivitetesh kulturore dhe letrare që do të pasojnë në javët në vijim. Do të kemi kënaqësinë të mirëpresim personalitete të njohura nga fusha e akademisë, letrarisë dhe kulturës, si dhe përfaqësues të minoritetit arumun. Recenzën e parë publike të veprës do ta mbajë Ambasador Prof. Assoc. Dr. Arben Cici, një figurë e shquar akademike dhe diplomatike, ish-ambasador i Shqipërisë në disa vende, shkrimtar dhe profesor në Universitetin Mesdhetar të Shqipërisë, një mik i vyer i Tricolor.al.
Për shkak të interesit të lartë dhe pjesëmarrjes së madhe të parashikuar për këtë aktivitet, kapacitetet e ambienteve të planifikuara fillimisht në Ambasadën e Rumanisë në Shqipëri nuk rezultuan të mjaftueshme për të mirëpritur të gjithë të pranishmit. Me qëllim garantimin e një mbarëvajtjeje sa më dinjitoze dhe të përshtatshme për të gjithë të ftuarit, kemi marrë vendimin për ta zhvendosur aktivitetin në një ambient më të gjerë.
Në këtë kuadër, ju njoftojmë se promovimi i librit do të mbahet në:
???? Universitetin Mesdhetar të Shqipërisë
???? Ditën e martë, 18 mars 2025
???? Ora 14:00
Kërkojmë mirëkuptimin tuaj për këtë ndryshim dhe ju falenderojmë për mbështetjen dhe entuziazmin tuaj për këtë ngjarje të rëndësishme kulturore. Jemi të sigurt se kjo do të jetë një mundësi e shkëlqyer për të ndarë bashkë reflektime mbi një vepër me vlera të jashtëzakonshme letrare dhe historike.
Ju ftojmë përzemërsisht të bëheni pjesë e këtij momenti të veçantë dhe të ndajmë së bashku pasionin për letërsinë dhe kulturën.
Pjesëmarrja juaj do të ishte një nder për ne!
