Ilie Bolojan është emëruar nga Presidenti Nicușor Dan për postin e kryeministrit. Dekreti me të cilin presidenti Nicușor Dan e emëron Ilie Bolojan si kandidat për postin e kryeministrit, për të kërkuar votëbesimin e Parlamentit mbi programin dhe listën e re të Qeverisë, është publikuar të premten në Fletoren Zyrtare.
Presidenti Nicușor Dan njoftoi të premten se e ka emëruar Ilie Bolojan, kreun e përkohshëm të PNL-së, për postin e kryeministrit. Kreu i shtetit zhvilloi të enjten konsultime me partitë dhe forcat politike të përfaqësuara në Parlament për të përcaktuar kandidatin për postin e kryeministrit. Në moshën 56-vjeçare, Ilie Bolojan, aktualisht President i Senatit, ka ushtruar detyrën e përkohshme si President i Republikës në Pallatin Cotroceni që nga 12 shkurti, pas dorëheqjes së Klaus Iohannis, deri më 26 maj, kur Nicușor Dan u betua në detyrën e Presidentit.
Më 26 maj, Bolojan rifilloi mandatin si President i Senatit, pasi ia dorëzoi detyrën e kreut të shtetit Nicușor Dan-it. Ilie Bolojan ka një karrierë të pasur: ka qenë këshilltar bashkiak, këshilltar qarku, prefekt, kryetar bashkie, kryetar i Këshillit Qarkut, President i Senatit dhe President i përkohshëm i Rumanisë.
