Rektori i Universitetit të Mjekësisë, Tiranë, Prof. Dr. Xheladin Dracini, u prit nga Sh.T.Z. Octavian Șerban, Ambasador i Rumanisë në Republikën e Shqipërisë, si dhe nga z. Cristian Cutaș, drejtues i Zyrës për Promovimin Tregtar dhe Ekonomik pranë Ambasadës. Ky takim u mundësua nga Dr. Ferjolt Ozuni, drejtues i projektit “Tricolor.al”, i cili prej kohësh ka shërbyer si një urë lidhëse për nisma bashkëpunimi mes institucioneve shqiptare dhe rumune në fusha të ndryshme akademike, kulturore dhe ekonomike.
Në qendër të diskutimeve ishte forcimi i bashkëpunimit institucional dhe avancimi i marrëveshjeve konkrete me universitetet e mjekësisë në Rumani. Palët theksuan rëndësinë e nënshkrimit të marrëveshjeve të reja ndëruniversitare që do të krijojnë baza të qëndrueshme për projekte të përbashkëta kërkimore, shkëmbim të studentëve dhe stafit akademik, si dhe organizimin e konferencave dhe aktiviteteve të përbashkëta shkencore. Një vëmendje e veçantë iu kushtua aplikimeve të përbashkëta në kuadër të programeve Erasmus+ dhe fondeve të tjera evropiane, duke synuar rritjen e kapaciteteve akademike dhe integrimin më të thellë në hapësirën evropiane të arsimit të lartë dhe kërkimit shkencor.
Roli i Ambasadës së Rumanisë në Tiranë në këtë proces është thelbësor, pasi ajo jo vetëm që ofron mbështetje diplomatike dhe institucionale, por edhe vepron si katalizator për bashkëpunime konkrete mes universiteteve dhe strukturave kërkimore të dy vendeve. Përmes angazhimit të drejtpërdrejtë të Ambasadorit dhe strukturave përkatëse pranë Ambasadës, krijohet një klimë besimi dhe serioziteti institucional që i jep qëndrueshmëri nismave të përbashkëta. Në të njëjtën kohë, projekti “Tricolor.al” ka dëshmuar se diplomacia akademike dhe kulturore mund të mbështetet fuqishëm nga iniciativa të pavarura që synojnë afrimin mes dy kombeve, duke promovuar dialogun, shkëmbimin e përvojave dhe ndërtimin e partneriteteve afatgjata.
Ky takim përforcon angazhimin e Universitetit të Mjekësisë, Tiranë, për ndërkombëtarizimin e arsimit të lartë dhe për zgjerimin e bashkëpunimit me institucione prestigjioze të mjekësisë në Rumani. Në një kohë kur sfidat në shëndetësi kërkojnë qasje gjithnjë e më të integruara dhe multidisiplinare, partneritete të tilla strategjike janë thelbësore për rritjen e cilësisë akademike dhe zhvillimin shkencor. UMT vijon të ndërtojë ura bashkëpunimi që jo vetëm rrisin standardet e formimit profesional të studentëve dhe stafit, por edhe kontribuojnë në forcimin e marrëdhënieve dypalëshe mes Shqipërisë dhe Rumanisë në një dimension të ri, atë të dijes dhe inovacionit.
