Në zemër të Rumanisë, midis maleve të Karpateve, shtrihet një nga rrugët më mbresëlënëse të Europës: Transfëgërëshan (ro: Transfăgărășan). Ky aks spektakolar, i gjatë rreth 90 kilometra, lidh Muntenian me Transilvaninë duke kaluar përmes peizazheve alpine që të lënë pa frymë. I ndërtuar midis viteve 1970–1974, Transfëgërëshan nuk është thjesht një rrugë automobilistike, por një vepër madhështore inxhinierike dhe një monument i ambicies njerëzore për të pushtuar natyrën malore.
Ideja për ndërtimin e kësaj rruge i përket diktatorit Nicolae Ceaushesku, i cili e shihte projektin si një rrugë strategjike ushtarake, të aftë për të siguruar lëvizjen e trupave në rast të një invazioni sovjetik. Puna ishte tepër e vështirë: u përdorën qindra mijëra tonë dinamit për të hapur shtratin e rrugës nëpër shkëmbinj, ndërsa dhjetëra punëtorë humbën jetën gjatë ndërtimit. Rezultati, megjithatë, ishte i jashtëzakonshëm: një rrugë që ngjitet deri në lartësinë 2.042 metra në Shkëmbin Bëlea, një nga kulmet më të larta automobilistike të Europës.
Peizazhet e Transfëgërëshanit janë të mahnitshme. Rruga ngjitet me kthesa të ngushta dhe gjarpërime të pafundme, duke ofruar pamje të liqeneve akullnajore, pyjeve të dendura dhe majave shkëmbore. Një nga atraksionet më të njohura është Liqeni Bëlea (ro: lacul Bâlea), i cili shtrihet në një lartësi prej mbi 2.000 metrash dhe mbetet një destinacion i preferuar për turistët gjatë verës dhe aventurierët e sporteve dimërore. Përveç kësaj, përgjatë rrugës gjenden edhe monumente si diga e Vidrarit dhe kështjella e Poienari, e lidhur me legjendën e Vlad Cepesh, i njohur si Drakula.
Fama e Transfëgërëshanit kaloi kufijtë e Rumanisë në vitin 2009, kur emisioni britanik Top Gear e shpalli “rrugën më të bukur në botë për t’u drejtuar një makinë”. Që prej atëherë, qindra mijëra turistë nga e gjithë bota vizitojnë çdo vit këtë mrekulli inxhinierike për të përjetuar emocionin e vozitjes në një nga rrugët më spektakolare të planetit. Motociklistë, shoferë sportivë dhe turistë të zakonshëm e konsiderojnë Transfëgërëshanin një përvojë që duhet jetuar të paktën një herë në jetë.
Sot, rruga mbetet e hapur vetëm gjatë muajve të verës, nga qershori deri në tetor, për shkak të dëborës së dendur dhe rreziqeve në sezonin e ftohtë. Megjithatë, kjo e bën edhe më të veçantë: një destinacion i përkohshëm, një atraksion sezonal që kthehet çdo vit në një festë të automobilizmit dhe turizmit malor. Transfëgërëshan është më shumë se një rrugë – është një simbol i aftësisë njerëzore për të sfiduar natyrën, por edhe një ftesë për të zbuluar bukuritë e paprekura të Karpateve rumune.
Video nga Emisioni "Top Gear" ne BBC
GALERI FOTOGRAFISH
