Qyteti rumun Baia Mare, në veri të vendit, do të mbajë titullin Qyteti Evropian i Krishtlindjeve 2027. Vendimi u mor nga juria ndërkombëtare e konkursit European Capital of Christmas, i cili çdo vit vlerëson qytetet evropiane për mënyrën se si i ruajnë dhe i promovojnë traditat e vlerat e festës së Krishtlindjeve.
Titulli lidhet me festat e dimrit të vitit të ardhshëm, kur bashkia do të organizojë një program të veçantë me ngjarje kushtuar Krishtlindjeve.
Një projekt i ndërtuar mbi kolindat dhe traditat
Baia Mare njihet edhe si Orașul Castanelor, pra „Qyteti i Gështenjave”, për shkak të gështenjave të ngrënshme që rriten në zonë. Qyteti bindi jurinë me një projekt që vë në qendër kolindat, këngët tradicionale rumune të Krishtlindjeve, si dhe zakonet e krahinës së Maramureșului. Programi përfshin gjithashtu ngjarje kulturore, aktivitete për fëmijët dhe zbukurime festive në qytet.
Projekti mori pikët maksimale dhe votën unanime të jurisë në kategorinë ku konkurroi. Shpallja u bë të martën, së bashku me dy çmimet e tjera të konkursit. Titulli Kryeqyteti Evropian i Krishtlindjeve 2027 i shkoi qytetit zviceran Basel, ndërsa ai i Fshatit Evropian të Krishtlindjeve 2027 iu dha qytetit kroat Omiš.
Kryetari i bashkisë, Ioan Doru Dăncuș, e cilësoi vlerësimin si diçka më shumë se një titull. „Përtej vetë titullit, ky dallim na jep të drejtën të përdorim zyrtarisht emërtimin dhe identitetin vizual European City of Christmas 2027, por edhe një mundësi të rëndësishme promovimi ndërkombëtar”, deklaroi ai.
Sipas kryebashkiakut, njohja evropiane mund të ndihmojë në tërheqjen e turistëve, në mbështetjen e bizneseve vendase dhe në njohjen e traditave të Maramureșit jashtë vendit.
Konferencë në Kështjellën Pocol dhe ceremonia në Barcelonë
Që nga fundi i vitit 2025, Baia Mare është pjesë e Eurocities, një rrjeti që bashkon mbi 200 qytete evropiane dhe lehtëson bashkëpunimin mes administratave vendore në fusha si kultura, ekonomia dhe zhvillimi urban.
Autoritetet vendore po shqyrtojnë edhe mundësinë e organizimit të një konference për traditat evropiane të Krishtlindjeve në Castelul Pocol, Kështjellën Pocol. Ndërtesa historike u ngrit në fillim të shekullit XX nga një ish pronar minierash ari dhe është në restaurim që prej vitit 2025. Në këtë takim do të marrin pjesë edhe përfaqësues të qyteteve anëtare të Eurocities.
Ceremonia e ndarjes së çmimeve do të zhvillohet më 3 dhjetor 2026 në Manastirin e Pedralbes në Barcelonë, qyteti që aktualisht mban titullin e Kryeqytetit Evropian të Krishtlindjeve.
Konkursi organizohet nga Christmas Cities Network dhe ka tri kategori, sipas numrit të banorëve. Titulli i Kryeqytetit Evropian të Krishtlindjeve u drejtohet qyteteve me mbi 150.000 banorë, ai i Qytetit Evropian të Krishtlindjeve atyre me 10.000 deri në 150.000 banorë, ndërsa kategoria e Fshatit Evropian të Krishtlindjeve është për vendbanimet me më pak se 10.000 banorë.
Juria ndërkombëtare u kryesua nga Danuta Hübner, ish komisare evropiane për politikën rajonale, dhe përfshiu ekspertë të njohur të kulturës, administratës publike dhe politikave evropiane.
Organizatorët dhanë edhe një përmendje të veçantë për Fuentes de Oñoro në Spanjë dhe Vilar Formoso në Portugali, që e festojnë bashkërisht Krishtlindjen pikërisht në kufirin mes dy vendeve. Një bredh rreth 15 metra i lartë vendoset mbi vijën kufitare, duke u mundësuar vizitorëve të kalojnë simbolikisht nga një shtet në tjetrin. Panairi i Krishtlindjeve shtrihet përgjatë rrugës që bashkon dy vendbanimet, ndërsa parada e Tre Mbretërve përshkon si rrugët spanjolle, ashtu edhe ato portugeze.
Burimi: Mediafax
