Promovimi i librit “Për Dy Mijë Vjet” nga Mihail Sebastian i sjellë në Shqip nga Gersa Rrudha

Më 18 mars 2025, në ambientet mikpritëse të Universitetit Mesdhetar të Shqipërisë, u zhvillua një event me vlera të mëdha kulturore, akademike dhe diplomatike, promovimi i librit “Për Dy Mijë Vjet” të autorit rumun Mihail Sebastian, i përkthyer për herë të parë në gjuhën shqipe nga përkthyesja e re dhe plot pasion, Gersa Rrudha. Ky aktivitet u organizua nga platforma Tricolor.al, me mbështetjen e Ambasadës së Rumanisë në Shqipëri dhe nën kujdesin e veçantë të Ambasadorit Sh.T.Z. Octavian Șerban, duke shënuar një moment kulmor në jetën kulturore shqiptare të këtij fillimviti.

Ky ishte një event që i kaloi kufijtë e një promovimi letrar tradicional dhe u shndërrua në një tryezë të hapur të dialogut mes kulturave, historive dhe përfaqësuesve të botës akademike dhe diplomatike. Tricolor.al, në këtë rast, u shfaq jo vetëm si një platformë kulturore, por si një aktor me vizion të qartë dhe mision të qëndrueshëm për ndërtimin e urave të qëndrueshme mes Shqipërisë dhe Rumanisë, përmes letërsisë, përkthimit dhe promovimit të trashëgimisë së përbashkët kulturore.

Eventi i moderuar nga miku Tricolor.al, Dr. Dorian Leka, u hap me fjalën përshëndetëse të rektorit të Universitetit Mesdhetar të Shqipërisë, Prof.Dr. Adrian Civici, i cili ndau me të pranishmit një reflektim të thelluar mbi marrëdhëniet historike shqiptaro-rumune dhe ndikimin e ndërsjellë në sferat e arsimit dhe kulturës. Me një qasje personale, ai përmendi edhe lidhjet familjare me Rumaninë, duke i dhënë fjalës së tij një dimension të veçantë emocional dhe historik.

Ndërkaq, Ambasadori i Rumanisë, Sh.T.Z. Octavian Șerban, vuri në dukje rolin e paçmuar të institucioneve arsimore dhe platformave kulturore si Tricolor.al në forcimin e miqësisë dhe shkëmbimit mes dy popujve. Ai e cilësoi përkthimin e veprave të letërsisë rumune në gjuhën shqipe si një akt i rëndësishëm diplomatik dhe kulturor, dhe vlerësoi punën e Gersa Rrudhës si një shembull frymëzues për të rinjtë që synojnë të ndërtojnë ura përmes penës.

Fjalët e ambasadorit u pasuan nga një recenzë e thelluar e veprës nga Prof. Assoc. Dr. Arben Cici, një emër i shquar në diplomacinë shqiptare, ashtu si dhe në fushën akademike dhe letrare shqiptare, i cili analizoi veprën nga këndvështrimi filozofik, estetik dhe historik. Ai theksoi rëndësinë e përkthimit të një vepre kaq sfiduese si “Për Dy Mijë Vjet” dhe e konsideroi këtë përkthim një triumf të vërtetë kulturor.

Kontributi i shtëpisë botuese Aleph, e përfaqësuar nga z. Gentian Cocoli, u bë gjithashtu i njohur përmes fjalës së tij, ku theksoi vlerën e bashkëpunimeve të tilla dhe nevojën për mbështetje më të gjerë të institucioneve për botime që sjellin më afër kulturat. Ai bëri thirrje për një angazhim më të madh institucional në shqipërimin e literaturës rumune, si një pasuri ende e pashfrytëzuar plotësisht për lexuesin shqiptar.

Në vijim të aktivitetit, u krijua një atmosferë e veçantë kulturore falë leximit dygjuhësh të pasazheve nga vepra, interpretuar nga anëtarja e Tricolor.al, zj. Niksmeralda Ozuni. Ky moment i ngrohtë dhe simbolik i dha një tjetër dimension promovimit, duke bërë që fjala e shkruar të marrë jetë në një mënyrë unike.

Në fund të eventit, Dr. Ferjolt Ozuni, drejtues i Tricolor.al, mbajti një fjalë mirënjohjeje dhe reflektimi për rrugëtimin e platformës, për mbështetjen e Ambasadës së Rumanisë dhe për kontributin e Universitetit Mesdhetar. Ai theksoi se ky ishte vetëm hapi i parë në një cikël të pasur ngjarjesh kulturore që Tricolor.al ka planifikuar në vijim.

Roli i Tricolor.al në këtë event nuk ishte thjesht ai i një organizatori logjistik, por i një promotori të një vizioni të ri për bashkëpunimin kulturor mes vendeve. Platforma arriti të tregojë se kur pasioni për kulturën bashkohet me profesionalizmin dhe mbështetjen institucionale, lindin momente që krijojnë histori të re.

Ky promovim, më shumë sesa një prezantim i një libri, ishte një ftesë për të reflektuar mbi fuqinë e letërsisë për të ndërtuar ura, për të rikujtuar miqësi të vjetra dhe për të frymëzuar brezat e rinj që të ecin përpara duke pasur si bazë dashurinë për dijen, për kulturën dhe për kombin. Tricolor.al, në këtë mision fisnik, dëshmon se e ardhmja e kulturës shqiptare është në duar të sigurta.